Brákarborg

Leikskólinn Brákarborg opnaði á nýjum stað sumarið 2022 í endurgerðu húsnæði. Brákarborg er sex deilda leikskóli fyrir 100 börn og þar starfa um 30 manns.

Byggingin er Breeam vottuð og hlaut Grænu skófluna 2022 fyrir mannvirki sem byggt hefur verið með framúrskarandi vistvænum og sjálfbærum áherslum. Nýlega hlaut Liska LIT verðlaunin fyrir ljósahönnun sína fyrir leikskólann Brákaborg. Við hönnun lýsingar innanhús var mikil áhersla lögð á að fylgja náttúrulegu svefnmynstri nemanda og starfsfólks með sjálfvirkri lýsingu sem breytist yfir daginn og stuðlar þannig að vellíðan fólks.

Við endurgerð bygginganna við Kleppsveg 150-152 var steypt burðarvirki endurnýtt og ný tengibygging byggð á milli húsanna. Það er gaman að segja frá því að áður fyrr var Kleppsvegur 150 verslunarkjarni og Kleppsvegur 152 var fyrrum skrifstofuhúsnæði Arkís arkitekta.

Vistferilsgreining var gerð þar sem borið var saman kolefnisspor nýbyggingar og endurgerðar. Niðurstaðan var sú að í heildina er kolefnisspor endurgerðrar byggingar fjórðungi lægra en ef sama bygging hefði verið byggð frá grunni. Ef einungis er horft til kolefnisspors byggingarefna, þá er um að ræða 56% lægra kolefnisspor.